വീടുകൾ കാത്തിരിക്കുന്നു

വീടുകൾ കാത്തിരിക്കുന്നു.

——————————————–

ചില്ലലമാരകളിൽ

ചിതലരിച്ചു കിടക്കുന്നുണ്ട് 

ചിറകറ്റ പുസ്തകങ്ങൾ..

അടുക്കി വെച്ചിട്ടുണ്ട്,

ഓർമ്മകളോരോന്നു

മുണങ്ങിക്കിടക്കുന്ന 

പട്ടുചേലകൾ .

പൊടിപിടിച്ചങ്ങനെ കിടക്കുന്നുണ്ട്,

നിറം പിടിപ്പിച്ചതും 

നിറം മങ്ങിയതുമായ 

കൗതുക ശേഖരങ്ങൾ 

ചുമരിൽ തൂങ്ങിക്കിടക്കുന്നത് 

ജീവിത യാത്രകളിലെ 

ചിരിച്ചിത്രങ്ങൾ.

സ്വീകരണ മുറിയിൽ 

വില കൊടുത്തു വാങ്ങിയ 

ഒരു തെരുവിന്റെ ചിത്രമുണ്ട്.

വഴി വിളക്കുകളും കൽത്തൂണുകളും മനോഹരമാക്കിയ തെരുവ്. ചിത്രത്തിൽ …

വീടില്ലാത്ത ഒരുവൻ 

ഒരു മൂലയിൽ ചുരുണ്ട് കിടപ്പുണ്ട്.

ദാഹിച്ചുണങ്ങിയ അകച്ചെടികൾ,

ചൂടും പുകയും 

പരിഭവങ്ങളുമില്ലാത്ത 

ഒരടുക്കള.

ജീവിതച്ചുളിവുകൾ 

വീഴാതെ വിരിച്ചിട്ട 

അതിഥി മുറികൾ …

മഴയും കാറ്റും വെയിലും

മുട്ടി വിളിച്ചിട്ടും

തുറക്കാത്ത 

ജനൽപ്പാളികൾ …

സ്വപ്നങ്ങൾ അടച്ചിട്ട ഒരു വീടും

ഇലകൾ പൊഴിഞ്ഞു

കിടക്കുന്ന വഴിയും

ഒച്ചയില്ലാതെ ഒരു താക്കോൽക്കൂട്ടവും കാത്തു കാത്തിരിക്കുന്നുണ്ട് 

ഒരു വിരൽ സ്പർശം..

വീട്ടകം നിറക്കാൻ

വീടു വിട്ടു പോയവന്റെ

വിരൽ സ്പർശം….